BUTUAN CITY – Wala’y transport group dinhi sa dakbayan sa Butuan nga musabay sa tulo ka adlaw’ng transport strike sugod karong adlawa sa grupong Samahang Manibela, Mananakay at Nagkaisang Terminal ng Transportasyon kon Manibela didto sa Luzon nga mulungtad hangtod sa Disyembre 11 aron iprotesta ang dugay nga aksyon sa gobyerno ug mga multa nga padayong gipatuman bisan pa man nakatuman na sila sa mga rekisitos.
Sigon ni Wilfredo Ybañez Jr, presidente sa Butuan City Transport Tricycle Federation, iya na nang gikonsulta ang ilang national chairman kung unsa ang ma-abag sa mga local transport groups kondiin gisultihan siya nga mahimong musalmot ang mga 4-wheeled vehicles.
Apan base sa iyang monitoring, wala’y bisan unsa mang grupo nga nagpadayag og kasibot nga mulambigit niini.
Dugang pa ni Ybañez, base sa iyang na-obserbahan, kung aduna matud pay passion ug tinuod nga pagtagad ang mga opisyal sama sa mga cabinet secretary, dili lisod ang paghatag og solusyon sa mga reklamo sa transport sector.
Sukad matud pa sa milabay nga panahon, dili maayo ang pagtagad sa gobyerno sa mga yango-ngo sa ilang sektor hangtud karon.
Gani, ilad-ilaron ra sila pinaagi sa pag-ingon nga hatagan og ayuda ug subsidy, apan klaro nga dili tanan makadawat tungod kay pinili ra ang mahatagan kansa dili kini mao ang ilang gipangayo alang sa long-term nga solusyon ug suporta gikan sa gobyerno.
