BUTUAN CITY – Pabiling wala’y opisyal nga kumpirmasyon gikan sa International Criminal Court kon ICC kung gi-isyu na ba ang warrant of arrest batok kang Senador Ronald “Bato” Dela Rosa.
Sigon ni Atty. Sonny Matula Presidente sa Federation of Free Workers, kung basehan ang gipasi-atab ni Ombudsman Jesus Crispin “Boying” Remulla, posibleng gi-isyu na ang warrant batok kang Dela Rosa, apan wala pa kini gipublisar sa opisyal nga website sa ICC.
Una nang gipadayag si Executive Secretary Lucas Bersamin nga wala pa makadawat og impormasyon ang Malacañang bahin sa maong isyu, samtang ang Department of the Interior and Local Government kon DILG nga wala pa usa’y nadawat nga dokumento o red notice gikan sa ICC kansa nagmando sa pagdakop kang Dela Rosa.
Sumala pa niini, nga kung adunay access si Remulla sa impormasyon, posible nga tinuod ang iyang giingon, apan gikinahanglan gihapon ang opisyal nga pahibalo gikan sa ICC aron masuta ang kamatuoran niini.
Dugang pa ni Atty. Matula, ugaling aduna nay gi-isyu sa ICC nga warrant of arrest batok kang Senador Dela Rosa, gikinahanglan matud pa nga mosunod ang Pilipinas base na sa Section 17 sa International Humanitarian Law kansa nagmando nga mokooperar sa international tribunal.
Posible usab ang boluntaryong pagsurender sa akusado o magsugod og extradition proceedings pinaagi sa 2nd level court sa Pilipinas.
Sama matud pa sa nahitabo kang kanhi Presidente Rodrigo Duterte, nga gi-serve ang warrant dihang mitugpa sa Ninoy Aquino International Airport kon NAIA gikan sa Hong Kong ang gisakyan niining abyon ug gidala dayon sa The Hague Netherlands.
Gibutyag usab niini, nga posible usab nga susamang lakang ang buhaton batok kang Dela Rosa kung mapamatud-an nga adunay gi-isyu nga warrant.
