BUTUAN CITY – Sayong nagginukdanay ang mga pulis sa Tampa, Florida human nga wala muhunong ang paspas kaayo nga drayber hangtod nga nawad-an kini og kontrol ug mibangga sa outdoor patio sa usa ka bar, hinungdan sa pagkamatay sa upat ka tawo ug pagka-angol sa laing 13.
Tulo sa mga biktima ang namatay diha-diha dayon, ug usa pa ang namatay sa ospital, samtang ang uban nga na-angol adunay nagkada-iyang extent sa ilang mga samad.
Gikostudiya na sa kapulisan ang 22-anyos nga suspetsado ug padayon ang imbestigasyon.
Sumala sa kapulisan, una silang nakabantay sa sakyanan nga nagmaneho og kaskas sa highway bandang 1:00 sa buntag (local time) ug dihang mibiya na sa interstate, gisundan kini sa Florida Highway Patrol, samtang nagpadayon gihapon kini sa paspas nga pagdagan sa kalsada sa siyudad.
Gisulayan sa mga opisyal ang usa ka “PIT maneuver” — usa ka kontrobersyal nga pamaagi sa pagpaling niini sa kilid aron mapahunong dayon.
Base sa usa ka 2023 report sa federal government, ang PIT maneuver usahay mahimong hinungdan sa pagkamatay sa mga inosenteng bystander, rason nga gamiton lang kini kung walay laing mas luwas nga pamaagi.
Dihang napakyas ang PIT maneuver, mihunong ang highway patrol sa ilang paggukod, apan nagpadayon gihapon sa pagdagan ang drayber, kondiin dinhi na nawad-an kini og kontrol ug mibangga sa Bradley’s bar, kondiin daghan ang nagtapok sa patio.
Ang maong bar nailhan nga paboritong tambayanan sa LGBTQ community, apan wala pa’y ebidensya nga nagpakita nga gi-target sa suspetsado ang grupo o negosyo.
