BUTUAN CITY – Personal nga midangop sa Bombo Radyo Butuan si Arcelo De Leon, residente sa Butuan City, aron ipaabot ang iyang nasinati sa usa ka parking boy nga naka-agbat niini samtang nagparada sa sentrong bahin ning siyudad aron mangumpra sa usa dakong grocery store.
Sumala ni De Leon, mipalag ang parking boy dihang mihangyo siyang dili una makahatag tungod sa kawala na niya’y sinsilyo kondiin gipamugos sa maong lalaki nga dili pwede nga dili muhatag.
Bisan nasayod matud pa ang lalaki nga usa siya ka reserved personnel sa Philippine Air Force, wala siya niini paminawa ug gibaharan na hinuon nga kuhaan og lagaraw dayong bahad nga dili na siya makaparada pag-usab sa maong lugar.
Dugang pa ni De Leon, nga ang iyang reklamo dili lang alang sa iyang kaugalingon kundili aron ipahibalo sa publiko ug makahatag og awareness ug masita sa mga law enforcement personnel tungod sa hulga nga mahatag niini.
Nanawagan siya sa lokal nga kagamhanan nga mahatagan kini og aksyon ug iprayuridad tungod kay dili lang siya ang nakasinati sa susamang insidente ug dili lang kini karon nahitabo.
