BUTUAN CITY – Dayag nga nakighi-usa ang Diocese of Butuan ngadto sa panawagan sa I-Tag White Movement nga batukan ang lapad nga kurapsyon karon sa gobyerno uban sa pagpanubag sa mga nalambigit niini ug pagpatuman sa good governance.
Gani, hugot ang ilang panawagan nga magsuot og puti kung mutambong sa misa karong bulana hangtud na sa Oktubre ug mag- display o kaha magsuot usab og puti nga ribbons.
Kini gikonsiderang usa ka sagradong lihok sa pagtuo ug panawagan alang sa transparensiya, accountability, good governance, ingon man purification ug kabag-uhan sa atong nasud.
Atol sa ordinasyon ngadto sa duha ka mga deacons nga gihimo sa kapilya sa St Peter’s Seminary ning siyudad sa Butuan kagahapon, gipasibaw sa diocese uban sa mga mitambong sa maong kalihukan ang hugot nga suporta sa nagkapalad nga panawagan nga batukan ang garapalang kurapsyon sa nasud.
Gina-ampo usab sa matag-misa ang balaang proteksyon gikan sa tanang mga pagsulay ug mga kalamidad samtang dungan nga naglakaw uban sa paglaum ug pagsalig.
