BUTUAN CITY – Andam si kanhi Senador Antonio Trillanes IV nga mu-atubang sa imbestigasyon sa Senado kalabot sa alegasyon nga siya ang gi-designate sa gobyerno aron mag-welfare check kang kang kanhi Pangulong Rodrigo Roa Duterte (FPRRD) nga nabilanggo karon sa International Criminal Court (ICC) sa The Hague, Netherlands kansa iyang gipanghimakak ilabina nga klaro matud pa ang mga polisiya sa ICC detention center nga dili basta-basta makabisita.
Nasayrang si Senador Robin Padilla ang nag-file sa Senate Resolution No. 141 aron imbestigahan ang legalidad ug propriety sa pagpadala kang Trillanes sa ICC detention facility.
Madumdumang gi-post ni Rep. Paolo Duterte ang hulagway ni Trillanes nga anaa gawas sa ICC facility, nga nagpasangil nga siya gi-assign sa gobyerno.
Gipanghimakak ni Trillanes ang mga balita nga nakuyapan ug napalgang nga walay panimuot si kanhi Pangulong Rodrigo Duterte samtang nakadetine sa International Criminal Court (ICC) detention center sa The Hague, Netherlands.
Ang pamahayag ni Trillanes mitumaw human sa pamahayag ni Bise Presidente Sara Duterte nga napalgang walay panimuot sa salog sa iyang detention room sa ICC ang iyang amahan.
Sumala ni Trillanes, dili tinuod ang maong insidente, dungan sa pagsiguro nga dunay medical team sulod sa detention center, gawas pa sa mga ambulansyang anaa nang daan sa gawas.
Matud niini, lima ra ka minuto ang kalayo sa ospital gikan sa ICC, busa imposible matud pang dili dayon ma-atiman ang kanhi pangulo.
Dugang pa ni Trillanes, wala usa’y igong basihan ang gikatahong problema sa memorya sa kanhi pangulo, nga una nang gipadayag sa iyang abogado nga si Atty. Nicholas Kauffman nga duna matud pa kini’y cognitive deficiency.
