BUTUAN CITY – Mas gipakusgan pa ni Department of Public Works and Highways kon DPWH Secretary Vince Dizon ang kampanya batok sa kurapsyon human gisang-at ang unang batch sa mga kasong kriminal batok sa pipila ka opisyal ug contractors ngadto sa Office of the Ombudsman.
Gi-akusahan silang duna’y kalambigitan sa mga anomalya sa flood control projects sa lain-laing dapit sa nasod.
Apil sa gi-imbestigahan ang mga opisyal sa Bulacan 1st District Engineering Office, lakip si district engineer nga si Henry Alcantara ug si Brice Hernandez, nga karon anaa sa Pasay City Jail.
Gipasakaan usab og kaso ang mga contractors nga Wawao Builders, Syms Construction Trading, ug St. Timothy Construction kondiin wala’y pyansang girekomenda.
Usa sa mga kaso nga gi-highlight mao ang tulo ka flood control projects sa Oriental Mindoro, nga bisan pa og dako ang pondo, apan wala gayo’y natukod nga istruktura.
Nangayo usab si Dizon og Immigration Lookout Bulletin Order (ILBO) batok kang kanhi Undersecretary Roberto Bernardo aron dili siya makabiya sa nasod samtang padayon ang imbestigasyon.
