BUTUAN CITY – Subling nagtapok ang libu-ang mga supporters ni kanhi Pangulong Rodrigo Duterte kagabii atol sa “Limang Buwan, Isang Sigaw: Free Duterte Concert” nga gipahigayon sa Coastal Road Bazaar, sa Davao City aron ipadayon ang panawagan sa pagpapa-uli sa kanhi pangulo nga gidetine pa sa International Criminal Court detention facility sa The Hague, Netherlands.
Lakip sa mga mitambong mao sila Senador Bong Go, Davao City Acting Vice Mayor Rigo Duterte II, 2nd District Representative Omar Duterte, ug PPP Party-list nominee Bryan Lim.
Nag-perform ang mga iladong personalidad sama nila Giselle Sanchez, Aila Santos & R2K, Wency Cornejo, Lazy Fat, Silent Sanctuary, Isla Riddim, Joey Ayala, ug uban pa.
Sa iyang pagpamulong, gibutyag ni acting Vice Mayor Rigo Duterte nga nagkahiusa ang mga supporters pagpakita sa ilang pagmahal sa kanhi pangulo bisan pa man nga managlahi ang relihiyon, kultura ug pagtuo.
Samtang nanawagan usab si Rep. Omar Duterte, sa mga supporters sa iyang apohan nga ipadayon ang legasiya sa kanhi pangulo alang sa sunod nga henerasyon.
