BUTUAN CITY – Karon nang sunod semana, i-inquest sa San Francisco Municipal Police Station ang mga kasong paglapas sa sections 5, 11 ug 12 sa Republic Act 9165 kon mas nailang Dangerous Drugs Act of 2002 batuk sa usa ka pulis nga ilang nadakpan sa drug buy bust operations ning mi-aging alas-11:30 sa gabii sa Purok 2, Barangay Alegria, lungsod sa San Francisco, Agusan del Sur.
Aminado si PLCol Milan Naz, hepe sa kapulisan sa lungsod sa San Francisco, Agusan del Sur nga naggamitan og shabu ang nadakpan nilang aktibong pulis nga si alyas Edwin, 32-anyos, minyo, residente sa Purok 6, Barangay Amaga, lungsod sa Barobo, Surigao del Sur.
Kini human siya nagpositibo sa gihimong drug test kondiin gawas sa paggamit sa ginadiling druga, nakumpirma usab nila ang pagpamaligya niini sa maong epektos human nila kini nakatransaksyon ug napalitan pa sa ilang poseur buyer.
Sigon ni LCol Naz, Taud-taud na matud pa nilang gi-surveillance ang maong pulis kinsa aktibong nagserbsiyo ug na-assign sa Regional Communication and Electronic Unit sa Police Regional Office-12 nga nakabase sa General Santos City.
Nadakpan ang suspetsado sa iyang pinuy-anan tungod kay naka-work from home kini tungod sa iyang gihambin nga spinal tuberculosis gikan niadtong Pebrero ning tuiga hangtud na sa Pebrero sunod tuig.
Sa ilang interogasyon, girason sa maong pulis nga ang paggamit niya sa ginadiling druga, makatabang matud pa aron maminus-minusan ang kasakit sa iyang gihambing balatian. Samtang gawas sa kasong sibil, ang mother unit na usab sa maong pulis ang mupasaka og kasong administratibo batuk kaniya.
Nasuta pa nga dinhi sa Butuan City nagkuhaan og stock ang maong pulis kinsa duna na usa’y daghang parokyano sa ilang lungsod tungod kay nakapuyo man kini sa maong lungsod.
Nanawagan kini sa tanan nilang mga kababayan nga isumbong gilayon sa ilang buhatan higayong duna’y mamatikdang nalambigit sa ginadiling druga aron dali nilang ma-aksyunan.
