BUTUAN CITY – Dead-on-arrival na ang usa ka 16-anyos nga dalagita, sa bukirang barangay sa lungsod sa Balamban, lalawigan sa Cebu human nagpusil sa iyang sentido atubangan mismo sa iyang inahan human gikasab-an tungod sa matag-gabii niining pagpa-uli sa ilang panimalay.
Migawas sa imbestigasyon ni PLtcol. Ruel Burlat hepe sa Balamban Police Station nga gisumbong matud pa ang biktima sa iyang amahan ngadto sa iyang inahan niadto pang Biernes sa gabii (Agusto 8) nga nagtrabaho sa kauluhan tungod kay lawom nga gabii na kining mag-ulian.
Dihang nasuta usab sa inahan gikan sa magtutudlo sa biktima nga kanunay kining mag-cutting classes, nakadesisyon ang inahan sa pagpa-uli kondiin pasado alas-11:00 sa gabii niadtong Sabado, gideretso niini ang anak sa iyang kwarto kondiin nakita niyang anaa sa likod nga bahin ang kamot sa biktimang si alyas ‘Jane.’
Tungod sa kalawom na sa kagabhi-on, gisultihan na lang niini ang iyang anak nga mag-istorya na silang pagkabuntag apan dinhi na giti-on sa biktima ang armas nga mao diay ang iyang gitaguan sa likod nga bahin ug giti-on sa iyang sentido dayong kablit rason sa dakong kakurat sa inahan.
Daling gidala ang biktima sa Provincial Hospital sa lungsod sa Tambalanan ug gibalhin sa Vicente Sotto Hospital diin kini gideklarang patay na.
Dihang girespondihan sa mga pulis ang crime scene, wala na ang armas nga gigamit sa biktima ug wala usab masayod ang inahan tungod kay gi-una man niya og dala sa ospital ang iyang anak samtang gipadayag usab sa amahan nga dili iya ang armas nga maoy gikahibulungan karon sa kapulisan
