BUTUAN CITY – Subling gibarugan sa mga petitioners sa pag-nullify sa impeachment complaint batok kang Vice President Sara Duterte nga insakto ang ilang baruganan, ug insakto usab ang desisyon sa Korte Suprema, kansa nagdeklarang unconstitutional kini sugod pa lang sa sinugdanan.
Sumala ni Atty. Hillary Olga Reserva, usa sa mga petitioners sa pagpawalay bili sa maong impeachment complaint, legal ang tanang basehan sa ilang mga pangutana nga gisang-at sa Supreme Court.
Dili matud pa malalis nga sakto ang ilang pangutana kung legal ba ang gihimo sa House of Representative sa pagsang-at ug pagpadayon sa ika-upat nga impeachment complaint tungod sa unang tulo nga gihipusan lamang sa ubos balay-balauranan.
Dugang niini, musangko ang tanan sa intensyon sa impeachment complaint ilabina nga daghan matud pang mga pamaagi aron mahimong accountable ang bise presidente sa mga nahimo niini, ug dili kay dali-dalion pinaagi sa impeachment case.
Giklaro usab ni Reserva nga mamahimo gihapong makadesisyon ang Korte Suprema sa nasangpit nga reklamo tungod kay parte man usab kini sa legal nga kalihukan.
