BUTUAN CITY – Gi-ablihan kagahapong adlawa sa Surigao del Norte Police Provincial Office ang tulo ka adlaw nga 1st PD Dablo’s Shootfest sa SUPRA Firing Range, nga nahimutang sa Sitio Malico, Barangay Luna, Surigao City.
Gipangunahan kini ni Surigao del Norte Police Provincial Director PCol Warren Dablo nga gi-apilan sa miyembro sa provincial staff, mga range officers, ug mga personahe sa Philippine National Police (PNP) ingon man mga civilian shooting enthusiast.
Gisundan kini sa Panumpa sa Sportsmanship, usa ka safety orientation ug sa ceremonial shoot.
Ang level 2 competition nga gi-aprobahan sa Philippine Shooters and Match Officers Confederation (PSMOC), naglangkob sa walo ka stage nga nagkinahanglan og minimum nga 160-rounds alang sa handgun ug pistol-caliber carbine.
Nanghinaut ni PCol Dablo nga pinaagi niini nga shooting competition, mas mapa-ayo pa sa kapulisan ang ilang kahanas ug mapalig-on ang panaghi-usa sa pagserbisyo ug pagpanalipod sa katawhan sa Surigao del Norte.
