BUTUAN CITY – Gipasabot sa Malakanyang nga ang pag-usab-usab sa presyo sa lana sa world market maoy rason nga wala ipadayon sa gobyerno ang paghatag og fuel subsidy sa transport sector ilabina sa mga mag-uuma ug mangingisda.
Gipagawas sa Malakanyang ang maong pamahayag human sa kasubo sa pipila ka transport groups tungod kay wala madayon nga fuel subsidy ning mi-aging semana human nisaka ang presyo sa lana hangtod sa singko pesos.
Sumala ni Palace Press Officer Atty. Claire Castro, wala matud pa miabot og tag 80-dolyares matag bariles ang presyo sa krudo nga maoy basehan sa kagamhanan sa paghatag og fuel subsidy.
Sumala niini, dunay mga higayon nga dili dayon makadesisyon ang gobyerno tungod kay nagdepende ra man sila sa kasamtangang sitwasyon sama sa panagbangi sa Iran ug Israel nga nahunong usab sa wala pa gilusad ang fuel subsidy.
Dugang ni Castro, dili ihikaw sa kagamhanan ang gikinahanglan sa transport sector basta subay lang kini sa balaod ug regulasyon sanglit nasayod man sila sa sitwasyon sa mga public utility vehicle kon PUV drivers, operators ug transport groups kondiin lakip kini sa mga prayoridad ni Pangulong Ferdinand Marcos Jr.
