BUTUAN CITY – Gipawala’y bili sa 2nd Division sa Commission on Elections kon COMELEC ang proklamasyon ni Luis “Joey” Chua Uy isip representante sa 6th District sa Manila dayong deklara kang Bienvenido “Benny” Abante nga maoy tinuod nga nakadaog sa May 12 local and national elections.
Gipagawas sa dibisyon ang desisyon human gideklara nga void ab initio ang certificate of candidacy (COC) ni Uy ug nga wala na siiya gi-ila nga kandidato tungod kay dili siya usa ka natural-born nga Filipino, kansa sukwahi sa iyang gisulat sa iyang COC.
Mahimo ka gihapon kining i-apela ni Uy sa Comelec en banc kondiin ang petisyon batuk kaniya, gisang-at ni Abante.
Sa ilang resolusyon, gipadayag sa 2nd Division nga ang mga ginikanan ni Uy, dili mga Pilipino dihang siya natawo niadtong Marso 15, 1962 ug ang isyu kalabot sa iyang citizenship, nakalatid ubos sa 1935 Constitution.
Nasayran nga ang amahan ni Uy usa ka Chinese citizen nga nahimong naturalized Filipino niadtong Agosto 1967, lima ka tuig human natawo si Uy samtang ang iyang inahan nga gika-ingong usa ka Filipina sa wala pa siya naminyo, niadtong Enero 1944 sa amahan ni Uy, nasuta nga usa diay ka Chinese national.
Tungod niini, gilatid sa resolusyon nga pareho nga dili mga Pilipino ang iyang mga ginikanan dihang natawo ang respondent, hinungdan nga dili siya makonsidera nga usa ka natural-born nga Pilipino.
Gipadayag pa nga dili valid ang pag-angkon ni Uy nga siya usa ka natural-born citizen kay kinahanglan nga ang usa ka tawo, usa na ka citizen sukad pagkatawo, nga walay gikinahanglan nga aksyon aron hingpit nga makab-ot ang iyang citizenship.
Sa iyang kaso, nahimo siyang Filipino citizen human ang iyang amahan mahimong naturalized Filipino.
Gawas pa, gihatagan si Uy og identification certificate sa Bureau of Immigration, nga nagpasabot nga adunay panginahanglan sa pagpanghimo og lakang ubos sa mga balaod sa immigration, citizenship, ug pagparehistro sa mga langyaw.
Matod pa, si Uy usa lang ka naturalized Filipino ug dili natural-born, maong sayop ang iyang gisulat sa iyang COC nga siya usa ka natural-born citizen kansa makonsiderang “material misrepresentation.”
Tungod niini, dili siya kwalipikado nga modagan o muhupot sa posisyon isip myembro sa House of Representatives, ug ang iyang proklamasyon supak sa Konstitusyon rason nga gideklara sa 2nd Division si Abante nga mao ang lehitimong napili nga membro sa House of Representatives alang sa ika-unom nga distrito sa Manila.
Sa eleksyon niadtong Mayo 12, napildi ni Uy si Abante pinaagi sa nakuhang 64,700 ka mga boto batok sa kapin 63,300 ka mga boto ni Abante kinsa usa sa mga opisyal sa House of Representatives nga nangulo sa Quad Committee investigation kabahin sa mga patay sa drug war ug kalihokan sa mga Philippine Offshore Gaming Operators (POGO).
