BUTUAN CITY – Gipanghimakak ni kanhi Presidential Spokesperson Atty. Harry Roque ang mingkaylap nga impormasyon nga gibinasura matud pa sa The Netherlands ang iyang asylum application.
Sa iyang gipagawas nga video message, giklaro ni Roque nga wala’y kamatuoran ang gipasi-atab ni Department of Justice Secretary Jesus Crispin Remulla nga gi-deny ang iyang aplikasyon.
Kini na matud pa ang ikaduhang higayon nga nagpakaylap og fake news ang kalihim sunod sa una niining gipasi-atab na duna siya’y multiple passports.
Dugang pa ni Atty. Roque, wala na siya nagduda pa bahin niini, ilabina nga nahitabo kini ilawom sa kasamtangang administrasyon. Iyang giklaro nga miadto lang siya sa Germany alang sa usa ka aktibidad uban sa pipila ka mga kaubang Pilipino human gi-imbitar sa FIlipino Community.
Birada pa niini, dili na matud pa kinahanglanf mugasto og bilyunes pisis ang gobyerno aron lang siya pangitaon o sayron ang iyang lokasyon tungod kay iya man kining ipahibalo sa publiko diha sa iyang social media account.
