BUTUAN CITY – Napuno sa pagpasalamat sa Kahitas-an, sa iyang pamilya, sa iyang boxing team, mga fans ug tigbalita si People’s Champ Manny Pacquiao human siya na-induct sa International Boxing Hall of Fame kon IBHOF nga gipahigayon sa Turning Stone Casino sa Canastota, New York.
Gi-ila sa mga organizers ang dili basta-bastang record nga natala ni Pacman hinungdan nga gipasidunggan siya sa IBHOF Class of 2025 atol sa Banquet of Champions tungod sa pagtabang nga mahulma ang legasiya sa pa-ugnat sa kusog ug pagdasig sa musunod nga mga henerasyon.
Si Pacquiao ang nag-unang ngalan sa mga inductees sa 2025 modern category nga gi-enshrine atol sa seremonya kondiin wala pa siya nagsa-ulog og bongga tungod kay kinahanglan pa niyang mubalik sa training alang sa iyang away karong Hulyo 19 nga himuon sa Las Vegas, Nevada batuk kang World Boxing Council kon WBC champion Mario Barrios.
Samtang sa iyang pagpamulong, gibalik tan-aw ni Pacman ang walo ka dibisyon diin siya mikampyon sa kalibutan, mga titulo sa upat ka lain-laing dekada, apil na ang pinakatigulang nga welterweight world champion sa kasaysayan kansa dili lang matud pa opinyon kondili pulos kamatu-uram.
Nakatutok ang iyang pagpamulong sa iyang kahibulungan nga nahimo —gikan sa kabus kaayo nga bata nga nagpuyo sa kadalanan sa General Santos City ngadto na sa pagdaog og titulo sa walo ka klase sa timbang, gikan sa 106-pound nga debut hangtod sa 154-pound nga titulo.
