BUTUAN CITY – Patay ang 17-anyos nga dalagita samtang nagpa-alim pa ang iyang mga angol nga ginikanan human sila gi-atake sa mga putyukan sa Brgy Fatima, New Bataan, Davao de Oro ning mi-aging adlaw.
Sumala sa amahang si Emmanuel Cañas, midalikyat sila sa ilang ilaya nianang buntag ka-uban ang iyang anak ug iyang asawa kondiin namahulay matud pa ang iyang mag-inahan sa ilang payag samtang siya nanghagbas sa ilang uma.
Kalit lang matud pang misinggit og pakitabang ang iyang asawa ug sa iyang pagsusi, napuno na sa putyukan ang ulo sa iyang anak samtang ang iyang asawa wala nagrabihan tungodkay dali kining nakaputos og jacket kondiin gigukod pa sila sa mga insekto dihang dali silang nanibat.
Dali silang gidala sa balay tambalanan apan gideklara dead-on-arrival sa attending physician angiyang anak kansang nawong nanghubag pa nga gihaya sa ilang panimalay.
