BUTUAN CITY – Nakabsan sa kinabuhi ang usa ka 3-anyos nga batang babaye human wala maka-antos sa paglugos sa iyang 17-anyos nga igsoon ning mi-aging adlaw didto sa Sitio Narra, Brgy. Nuing, lungsod sa Jose Abad Santos (JAS), lalawigan sa Davao Occidental.
Sigon ni PCpl. Jeffrey Angeles sa Jose Abad Santos Municipal Police Station, hubog ug lango sa ilegal nga druga niadtong tungura ang suspetsadong gitago lang sa pangalang Hudas.
Migawas sa imbestigasyon nga dihang wala’y nagbantay sa iyang manghod atol sa iyang pagpa-uli, iya kining gidala sa pugon sa kopras ug didto gipanamas-tamasan ang manghod kinsa nakasinggit pa ug nakapangayo og tabang nga nadungog usab sa mga silingan.
Na-abtan sa mga tawo nga nakatulog na ang suspetsado samtang nakabsan sa kinabuhi ang bata human gidakdakan og bug-at nga butang ang ulo niini ug nakita nga duna’y laceration ang kinatawo niini.
Hinuon, wala gikumpirma sa kapulisan kung unsa ang hinungdan sa kamatayon sa bata, gumikan doktor lang matud pa ang makasulti niini.
Daling gisikop ang suspetsado ug anaa na sa kustodiya sa kapulisan sa maong lungsod ug pasakaan og kasong rape with homicide.
