BUTUAN CITY – Ubay-ubay nga mga kalampusan ang gitaho ni Mayor Joselito T. Roble sa Buenavista, Agusan del Norte kagahapong adlawa sa kapin 3 ka oras niyang ikatulo nga State of the Municipality Address kon SOMA.
Sa iyang taho sa katawhan, gigamit ni Mayor Roble ang BUENAS framework, nga mibarug isip Building Up Infrastructure, Uplifting Public Services, Enhancing Economic Growth, Nurturing the Environment, Advancing Public Safety, ug Strengthening Governance.
Gipasigarbo ni Mayor Roble ang mga accomplishments lakip na ang nagpadayong mga proyekto sama sa public market rehabilitation; sewage treatment plant (STP); children’s park; Rizal Park ug ang pagpalambo sa ilang municipal gymnasium.
Sa kinatibuk-an, mu-abot sa 2.1 bilyones pesos ang kantidad sa mga proyektong imprastraktura nga gibubo sa probinsyal nga panggamhana nga gipaagi sa Department of Public Works and Highways.
Gawas pa kini sa 20% Development Fund sa lungsod niadtong 2024 diin gipondohan niini ang mga proyekto sama sa municipal public cemetery.
Samtang sa hisgutanang taxes, gitaho ni Mayor Roble nga Uno porsiento ang pagsaka sa Real property Tax niadtong tuig 2024 nga anaa sa 12.69 milyones pesos apan sa uban pang taxes lakip na sa mga negosyo, misaka kini og 63.28 porsiento nga gikan sa 20.2 milyones niadtong 2023, miabot kini sa 33 milyones sa 2024..
