BUTUAN CITY – Naaresto na ang suspek nga mihimo sa paglugos og pagpatay og paglubong sa 14-anyos nga dalagita sa Panabo City.
Nailhan ang suspek nga si Mark Paltinca Bernabe, 40-anyos og residente sa Purok 4 Napo, Barangay Little Panay, Panabo City ang lugar diin nadiskubrihan ang patay’ng lawas sa biktima kagabii.
Nasayran nga niadtong Pebrero 28, 2025 sa dihang gitaho ngado sa kapulisan sa amahan nga taga Purok 3-C, Barangay San Francisco, Panabo City nga na-missing ang iyang anak diin gisaysay niini nga katapusang nakit-an ang iyang anak nga kauban ang suspek.
Base sa imbestigasyon sa Davao del Norte Police Provincial Office, nadiskubrehan ang lawas sa dalagita sa usa ka bag-ong gitabunang bangag sa yuta nga gipanag-iya sa suspek.
Sumala sa otoridad, brutal ang pagkamatay sa biktima, human kini gilugos, gipatay kini og gilubong.
Nagtingkagol na sa prisuhan ang suspek samtang mihimo og lawom nga imbestigasyon ang otoridad.
