BUTUAN CITY – Naghulat pa ang National Food Authority kon NFA-Caraga og instruction gikan sa ilang mga kadagkuan ilabina sa Department of Agriculture, kalabot sa mga angayang buhaton karong gideklara na ni Agriculture Secretary Francisco Tiu Laurel Jr. , ang food security emergency human niya nadawat ang aprubado nang resolusyon gikan sa National Price Coordinating Council (NPCC).
Sigon ni Leo Damole, regional manager sa National Food Authority kon NFA-Caraga, sa pagdeklara na sa food security emergency, sugdan gilayon ang pagpamaligya sa ilang mga stocks nga bugas ngadto sa mga local government units sa kantidad nga ₱36.00 matag-kilo aron ibaligya usab ngadto sa mga konsumidor sa kantidad nga ₱38.00 na matag-kilo.
Sa eksklusibong pakighinabi sa Bombo Radyo Butuan, gibutyag ni Damole nga target nilang suplayan og tag-10 mil ka sakong bugas ang mga lalawigan ug mga siyudad sa rehiyon.
Dugang pa sa opisyal, mag-agad lang sila sa mahimong kamanduan unya sa ilang administrador ug sa Department of Agriculture kung hangtud kanus-a sila mamaligya og bugas ngadto sa mga LGUs.
Ang ila lang matud pang gihulat nga ibalik sa DA ngadto sa ilang ahensya ang kagahom nga mamaligya og bugas sa mga merkado aron ma-estabilize ang presyo niini.
Misaad kining ipahibalo gilayon nila kung ipatuman na ang food security emergency aron masayod na ang tanan, ma-monitor ang ilang mga kalihukan ug makapa-abot sa ilang concerns ang mga tawo.
