BUTUAN CITY – Gipadeklarang ‘unconstitutional’ o supak sa Batakang Balaod ang Republic Act 12116 o General Appropriations Act (GAA) of 2025.
Sa petisyong giduso sa Supreme Court nila Davao Rep. Isidro Ungab, kanhe Executive Secretary Vic Rodriguez ug uban pa, gipamugos nga nakabaton matud pa og mga paglapas ang pag-apruba sa 2025 budget.
Partikular nilang gitumbok ang mga blangkong items sa bicameral conference committee report sa spending plan.
Sumala sa petitioners, makita sa Bicameral Committee Report ang pipila ka mga blangko, partikular na ang budget allocations para sa National Irrigation Administration (NIA), Department of Agriculture (DA) ug Philippine Coconut Authority.
Bisan og dunay kagahom ang Bicameral Conference Committee nga usahon ang bersiyon sa Senado ug sa Kamara, dili niini mamahimong amiyendahan ang mga probisyon nga dili klarong gilatid ang bersiyon nga dapat amiyendahan.
Gibarugan usab sa mga niini nga nakabaton og grave abuse of discretion ang bicam sa dihang gipirmahan ang committee report sa 2025 National Budget nga dunay blangko.
Nalapas usab matud pa ang Konstitusyon sa dihang pakyas kining hatagan ang sektor sa edukasyon sa pinakataas nga budget allocation.
