BUTUAN CITY – Nadakpan na sa kapulisan sa Bayugan City, sakop sa Agusan del Sur ang duha ka mga indibidwal nga gitu-uhang maoy milabay sa patay na nga bag-ong nahimugsong bata didto sa kasagbutang bahin duol sa sam-ang sa Purok 5, Brgy. Poblacion.
Sigon ni PLtCol. Josef Carlo Silang, officer-in-charge sa Bayugan City Police Station, gi-andam na nila ang kasong ipasaka batuk nila alyas Lino, 40-anyos, ulitawo, residente sa P-2C, Brgy. Taglatawan ingon man alyas Wing, 38-anyos, residente usab sa maong barangay kinsa nadakpan sa gilusad nilang hot pursuit operation kagahapong adlawa, Dominggo, Enero 19.
Gikostudiya na sa Bayugan City Police Station si alyas Lino samtang ang gitu-uhang inahan sa bata pabilin pang na-confine sa ospital sa Agusan del Sur.
Padayon pa ang lawom nga imbestigasyon sa kapulisan sa maong kremin aron masuta ang kinatibuk-ang detalye niini ug ang angayang patubagon niini.
