BUTUAN CITY – Gikonsidera nga pinakakorakot nga budget sa kasaykasayan sa Pilipinas ang gi-aprubahan sa kongreso nga 2025 national budget.
Gitumbok ni Atty. Sonny Matula, chairman sa Nagkaisa Labor Coalition, ang zero subsidy sa PhilHealth ug ang dakong kaltas sa budget sa Department of Education kansa wala giprayoridad tungod kay mas taas pa ang pundo sa Department of Public Works and Highways, dakong supak sa balaod ilabina nga halos pabor sa pulitiko ang maong national budget.
Gipananglitan niini ang 80 bilyones pisos nga gidugang ngadto sa House of Representatives samtang uno bilyones pisos usab sa Senado.
Anaa pa ang dugang pundo sa Ayuda para sa Kapos ang Kita Program kon AKAP diin sa pagsugod pa lang misupak na ang Senado, apan sa dihang gihatagan usab og pundo, mi-apruba na niini.
Tungod niini, gipangayu dayon nila nga i-veto ni Pangulong Ferdinand Marcos jJr ang maong national budget aron ibalik sa kongreso aron subling hisgutan.
Gipadayag usab ni Atty. Matula nga personal nga motibo kung nganong na-eskandalo ang national budget nga klarong gamiton unya sa kampanya alang sa 2025 election.
Tungod niini, plano nilang mag-rally sa kalsada ugaling dili i-veto sa pangulo ang national budget gawas pa sa planong pag-file og petition for certiorari tungod kay daghang probisyon sa balaod ang nasupak sa na-aprubahang national budget.
