BUTUAN CITY – Nadiskubrihan ang patay’ng lawas sa 12 ka mga tawo sa usa ka ski resort sa kanhe Soviet country nga Georgia.
Ang nakaplagang mga patay’ng lawas gilangkuban sa 11 ka mga Indian nationals og usa ka Georgian citizen nga nakit-an sa ikaduhang andana sa Indian restaurant sa Gudauri, ang pinakadakong ski resort sa nasud.
Ang mga biktima parehong nagtrabaho sa maong dakbalay. Sumala pa sa Indian Embassy sa Tbilisi nga ihatag nila ang tanang posibleng suporrta ngadto sa mga pamilya nga nahabilin sa mga biktima diin gipaningkamotan nga ma-repatriate ang 11 ka patay’ng lawas sa mga Indian nationals.
Base sa Preliminary tests, walay nakitang timailhan sa bayolente apan nakita ang power generator sa lawak nga nag-andar human nawala ang suplay sa kuryente.
Milusad na og imbestigasyon ang kapulisan diin posibleng lantawon ang kalapasan sa Article 116 sa criminal code sa maong nasud nga nakalatid ang negligent manslaughter.
Nasayran nga ang Gudauri nahimutang sa Caucasus Mountains dool na sa utlanan sa Russia diin misikat kini sa mga turista tungod sa hanyag nga baratong agianan ngadto sa main resorts sa Europa nga Alps.
