BUTUAN CITY – Giisa na ang general alert karun sa gobyerno sa Congo tungod sa pagkuyanap sa misteryosong flu-like disease human ang pagkamatay sa pila katawo.
Sumala sa Health ministry sa Congo, nga miabot na sa 71 katawo ang kumpirmadong namatay. Gilangkuban kini sa 27 katawo ang namatay sa ospital samtang dunay 44 usab ang namatay sa ilang balay sa Kwango province.
Sa nasangpit nga namatay sa ospital 10 niini tungod kay nawad-an og dugo samtang 17 ang nakabaton og respiratory problems.
Kadaghanan sa mga biktima nakasinati og mga sintomas sama sa hilanat, pagpanakit sa ulo, gahi nga ubo ug anemia.
Mikuha na ang mga epidemiological experts og mga samples ug ilang giimbestigahan na ang nasangpit nga sakit.
Mahinumdumang niadtong mga nakalabay nga buwan gideklara ang mpox epidemic sa Congo diin dunay 47-mil ka kaso ang natala, dunay kapin usa ka libo katawo ang namatay tungod sa maong sakit.
