BUTUAN CITY – Gipamugos sa Office of the Ombudsman nga sa pagkakaron, wala pa sila’y nakitang hinungdan aron kasuhan si Vice President Sara Duterte. Gipadayag kini ni Ombudsman Samuel Martires human gibutyag ni Justice Undersecretary Jesse Andres nga kinahanglan nang disiplinahon sa Ombudsman si VP Sara ug imbestigahan.
Subay niini, gibaharan ni Ombudsman Samuel Martires ang tanang mga ahensya nga nag-imbestiga sa besi-presidente nga duna sila’y kagahom nga i-take over ang maong imbestigasyon.
Gidugang pa ni Martires nga duna usab sila’y kagahom nga kuhaon ang mga hurisdiksyon sa pagdungog gikan sa National Bureau of Investigation hangtud na sa Kongreso.
Giyawyawan usab niini si Andres nga maghilom tungod kay manginlabot lang ang Ombudsman kung ang mga gihimo sa besi-presidente, duna’y kalabutan sa iyang posisyon. Panapos ni Martires, wala pa’y lig-ong basehan karon aron imbestigahan si VP Sara Duterte.
