BUTUAN CITY – Midepensa si Pangulong Ferdinand Bongbong Marcos Jr. sa mga nangita ug mikwestyon sa flood control projects sa kagamhanan human ningkuyanap online ang una niyang gipanghinambog nga mga proyekto sa nagkada-iyang dapit sa Pilipinas, apan dihang mihapak ang bagyong Kristine, daghang kinabuhi ang nakalas ilabina sa Bicol Region.
Sumala sa presidente, nabag-o na ang panahon karon tungod sa climate change, rason nga ang mga lugar nga kaniadto dili bahaonon, karon gipangbahaan na.
Pamugos pa sa presidente, duna’y mga flood control projects ng wala makaya ang volume sa tubig nga dala sa bagyong Kristine tungod kay nakadesinyo kini sa mga baha nga nahitabo atol sa bagyong Ondoy.
Gipasabot sa pangulo nga tungod sa pag bag-o sa klima, midoble ang gidaghanon sa tubig nga dala sa bagyong Kristine rason nga wala gayud nakaya sa ubang mga proyekto.
Dugang sa presidente, wala’y problema alang kaniya kung imbistigahan sa mga mambabalaod ang nasangpit nga mga proyekto apan kinahanglan matud pa nga lantawon ang siyensya, aron maklaruhan kalabot sa grabeng mga pagbaha.
Dugang pa sa presidente, panahon na aron bag-ohon ang kalig-on sa mga proyektong imprastraktura sa panggamhanan, lakip na niini ang mga tulay, ug uban pa.
