BUTUAN CITY – Match-match karon ang away nila Democratic presidential candidate Kamala Harris ug Republican candidate Donald Trump sa Colorado sa Estados Unidos kansang botasyon nagsugod na.
Sa eksklusibong pakighinabi sa Bombo Radyo Butuan, gibutyag ni Bombo international correspondent Ian Plaza nga naila na ang Colorado nga Democrat supporters apan daghan matud pa sa mga Democrats ang namalhin na pagsuporta sa Republicans.
Makapamatuod matud niini ang mga iladong personalidad sa Amerika ilabina sa Hollywood nga mga Democrat supporters ug namalhin na sa Republicans. Usa matud pa sa mga rason niini ang pagdaghan na sa mga illegal immigrants nga wala mahatagi og pagtagad sa Democrat government sama sa pagdaghan na sa mga tawong manglimos sa kadalanan bitbit ang ilang kabataan nga gikadiskurahe sa mga residente sa Colorado.
Ang saad ni Trump nga himuon pag-usab ang Amerika nga bantugan, maoy nakapa-aghat sa mga kanhi Democrat supporters pagbalhin sa Republicans. Sa pagdaghan matud pa sa mga illegal migrants, misaka usab ang kreminalidad ilabina nga wala sila’y kasudlan nga trabaho tungod kay ang mga kompanya ug mga negosyante, mangita man og saktong papel.
Kadaghanan matud pa sa mga illegal migrants sa Colorado naggikan sa Venezeula ug sa Puerto Rico. Dugang pa ni Plaza, ang mas gipalagan sa mga taga-Colorado tungod kay ang dagko nilang buhis, duna may mapadulong nga budget sa mga migrants alang sa ilang mga pagkaon ug pinuy-anan kondiin a ng uban, hatagan pa og hotel accommodation.
