BUTUAN CITY – Mi-abot sa 20 ka mga balay ang na-abo samtang usa ang partially burnt sa sunog nga natigayon sa Purok 2, Barangay Baan Riverside ning siyudad sa Butuan na nagsugod bandang alas-8:26 ang takna kagabii.
Sa eksklusibong pakighinabi sa Bombo Radyo Butuan, gibutyag ni Sr. Fire Inspector Ronald Vasquez sa Butuan City Central Fire Station nga naggikan ang kalayo sa pinuy-anan ni Irish Fortaleza nga gipuy-an sa pamilya nila Eva Aparece ug Baby Jones Abarquez.
Sa inisyal nga imbestigasyon, gibana-banang mu-abot sa 480-mil pisos ang damyos sa sunog tungod kay gama man sa mga light materials ang mayoriya sa mga balay nga na-abo. Giklaro pa sa opisyal nga wala sila’y nadawat nga fire call tungod kay sila mismo ang nakabantay sa dakong sunog sa rasong atbang lang sa ilang buhatan ang fire scene nga natung-an lang sa Agusan River rason sa dali nilang pagresponde.
Padayon ang gisuta sa ilang pwersa ang hinungdan sa pag-ulbo sa kalayo nga na-fireout pasado alas-onse na kagabii. Gidugang sa opisyal nga ubay-ubay matud pa nga mga fire prevention activities ang ilang gilusad aron timan-an sa tanan ang mga angayang buhaton aron malikayan ang sunog ingon man kung duna’y sunog.
