BUTUAN CITY – Hingpit nang napasakaan og kasong robbery with homicide ang tulo ka managsoong nanulis niadtong Sabado sa kaadlawon sa usa ka tindahan sa Brgy. San Roque, Kitcharao, Agusan del Norte. Madumdumang gipusil-patay sa mga suspetsado si Ginalyn Apolinario samtang angol usab ang iyang anak nga si Evangeline Apolinario ug ang tag-iya sa tindahan nga si Brgy. Kapitan Salvador Junio.
Sa eksklusibong pakighinabi sa Bombo Radyo Butuan, gibutyag ni Police Staff Sergent Rex Salino nga human sa pagpanulis nila Raymond Dadong, Reynaldo Dadong ug Roland Dadong, lumad nga taga-Jabonga, Agusan del Norte ug kasamtangang nagpuyo sa Brgy. Cawilan, lungsod sa Tubod, Surigao del Norte, gidangop gilayon kini sa ilang buhatan ngadto sa Surigao del Norte Police Provincial Office nga mao na usa’y nagpa-alerto sa tanan nilang mga municipal police units.
Daling gipasa sa mga police units ang CCTV footage nga nakuha gikan sa crime scene ug dihang namay-ungan ang usa sa mga responsable, gisuhid gilayon sa kapulisan sa Tubod kansa pila ka kilometros lang ang gilay-on gikan sa dapit nga nahitabuan, ang ilang person of interest.
Didto na-abtan ang mismong managsoon nga nag-videoke pa ug wala pa gihubo sa usa sa mga suspek ang iyang jacket nga maoy naklaro sa footage kansa nagkadugo pa, rason nga dali silang gisikop. Nakuha gikan sa ilang posisyon ang mga armas nga ilang gigamit, mga bala ug personal nga mga gamit.
