BUTUAN CITY – Dako ang pagsaka sa mga nakumpiskang illegal drugs dinhe sa rehiyon sa Caraga ning tuiga kumpara sa nakalabay nga tuig.
Sa datos nga gipagawas ni Police Major Jennifer Ometer, tigpamaba sa Police Regional Office -13, sa nakalabay nga tuig gikan sa bulan sa Enero ngadto sa Mayo muabot sa kapin 8-milyones ang kantidad sa illegal nga drugas ang nakumpiska nga gilangkuban sa shabu nga dunay 1,316.36 gramos og marijuana nga dunay 69 gramos. Mas taas kini sa karun nga miabot sa kapin 45-milyones pesos ang kantidad nga gilangkuban sa shabu nga mitimbang og 3,576.711 gramos, marijuana nga dunay 69 gramos, cocaine nga mitimbang og 3,820 gramos og ecstacy nga miabot sa usa ka kilo og 64 gramos.
Sumala sa opisyal nga mas daghang drug operation usab ang gihimo sa karun nga miabot sa 428 kumpara sa nakalabay nga tuig sa samang panahon nga dunalay 375 operation.
Aminado usab si Police Major Ometer nga gihimog bagsakanan ang rehiyon sa mga illegal drugs gikan sa kauluhan sama nalang sa cocaine nga nakitang naglutaw-lutaw sa Surigao Del Sur. Tungod niini gipadayon usab sa kapulisan ang hugot nga pag-implementar sa mga drug operation sa nakalabay nga administrasyon.
Alayon niini, mihangyu usab kini sa katawhan nga etaho gelayon sa otoridad ugaling dunay makitang kadudahan sa ilang tagsa-tagsa ka mga lugar.
