BUTUAN CITY – Dakong garbo sa tibuok Pilipinas ilabina sa Agusan del Sur ang pagpalukapa sa rising boxer sa nasud nga si Jayson “The Striker” Vayson human niini gipahagba ang igsuon sa sikat nga Japanese boxer nga si Naoya Inoue nga mao si Takeru Inoue human ang ilang panagsangka niadtong Dominggo sa Sumiyoshi Ward Centre sa Osaka, Japan.
Si Vayson, 25-anyos, nga taga-Barangay Sinobong, Veruela, Agusan del Sur, mao ang mimantsa sa record ni Inoue isip undefeated boxer sa light flyweight division.
Init ang sinukliay og kinomo nila Vayson ug Inoue hangtod sa 10th ug final round, kondiin mipatigbabaw ang kusog sa AgSurnon nga si Vayson ug nadepensahan niya ang World Boxing Organization kon WBO Asia Pacific Light Flyweight Title pinaagi sa unanimous decision sa iskor nga 96-94 , 96-94, ug 97-93.
Ang maong kadaugan naghimo og kasaba sa boxing community tungod kay nakita si Vayson nga bag-ong paglaum sa pagsikat na usab sa mga Pinoy Boxers sa international stage.
Usa ka dakong garbo sa Pilipinas ug sa probinsya sa Agusan del Sur si Vayson nga kasamatangang No. 3 sa International Boxing Federation’s (IBF) light flyweight division, No. 8 usab sa WBO ug No. 10 sa World Boxing Association (WBA).
