BUTUAN CITY – Gikumpirma ni PLCol. Jude Milan, ang tigpamaba sa Agusan del Sur Police Provincial Office nga duha na ang patay sa pagpamusil kagahapon sa may palm tree plantation sa Purok 1, Brgy. Bayugan 2, San Francisco, Agusan del Sur.
Kini human namatay ang usa sa duha nga nadala sa ospital nga si Jimmy Boy Lucero, ulitawo, parmol loader na residente sa Brgy. Maligaya sa maong lungsod ug misunod sa una nang on-the-spot nga namatay nga si Rolando Ayaton, parmol loader gihapon nga taga Purok-4 Barangay Libuac samtang nagpabilin.
Sa eksklusibong pakighinabi sa Bombo Radyo Butuan, gibutyag sa opisyal nga apil sa anggulong ilang gilantaw ang susamang insidente nga nahitabo kaniadto nga kinahanglan nilang mapalig-on tungod sa kawala’y nakasaksi atol sa maong insidente.
Gika-ingong kumpyansa ra ang mga biktima kisna gi-eskortan pa sa mga security personnel human nga wala’y dautang nahitabo sa una nilang pagkarga sa mga bunga sa palm tree rason nga sa katapusang hauling, sila-sila na lang og wala nay nagbantay kanila kondiin dinhi na sila gipamusil.
Nasayran nga ang mga biktima, sakop sa NDC-Guthrie Plantations Inc. kon NGPI Multi-purpose Cooperative rason nga apil sa ilang gilantaw sa imbestigasyon, ang posibleng paglapas matud pa sa mga biktima sa nasabutang settlement area diin sila pwedeng mag-harvest.
Anaa pa ang posibleng personal nga bangi tali sa mga biktima ug sa wala pa mailang mga responsable.
Narekober sa crime scene ang usa lang ka basiyo sa caliber 30 firearms kon carbine.
