BUTUAN CITY – Tumang kalipay ang gibati sa mga membro sa Barrio Site Liner Tricycle Operators and Drivers Association kon BALTODA nga nakabase ning siyudad sa Butuan human gilugwayan sa lokal nga kagamhanan ang paghatag og P2,000.00 nga fuel subsidy ngadto sa mga tricycle drivers ug operators.
Sigon ni Ritchie Ravelo, presidente sa maong kahugpungan, daghan sa ilang mga ka-ubanan ang wala ma-apil sa pinaka-ulahing hugna sa fuel subsidy distribution tungod sa pipila ka mga concerns nga wala nila gilayon ma-apas paghikay apil na kadtong wala masulod sa distribution system sa city government ug kadtong wala napahibalo tungod sa kakulang sa panahon.
Kini ilabina nga kinahanglang makadawat niini ang tanang rehistrado nilang mga ka-ubanan tungod kay dakong tabang naman kini sa ilang pagpamasada ilabina sa ilang kinitaan alang sa ilang pamilya.
Aminado si Ravelo nga dili supisyente kanila ang maong kantidad tungod sa grabeng pagmahal na sa presyo sa gasolina kumpara niadtong mga tuig diin kini gisugyot.
