BUTUAN CITY – Bugtong ang Caraga State University kon CSU Cabadbaran City campus lang sa entiro Caraga Region ang nagpadayon pagpangdawat og mga estudyante bisan pa man nga gihunong na sa mga Commission on Higher Education kon CHED ang pag-offer og Senior High School program diha sa mga state universities and colleges human kini mi-expire niadtong tuig 2021.
Sa eksklusibong pakighinabi sa Bombo Radyo Butuan, gipasabot ni Pedro Tecson, tigpamaba sa Department of Education kon DepEd-Caraga nga nalambigit sa maong programa ang mga state universities and colleges human gihangyo sa Department of Education aron lang ma-accomodate ang mga estudyanteng nasulod sa K-12 program niadtong tuig 2016 nga dili na ma-accomodate pa sa mga pampublikong tunghaan ilabina nga kritikal kadto nga panahon alang sa transition period.
Karong hingpit nang gitangtang sa CHED ang nasangpit nga programa, wala matud pa’y problema niini ang DepEd tungod kay ang galastuhan kon subsidiya sa mga senior high school students nga anaa pa sa CSU-Cabadbaran City campus, abagahon man sa lokal nga panggamhanan.
Bisan pa man sa desisyon sa CHED, giklaro ni Tecson nga magpadayon ang voucher program nga nasulod sa K-12 ngadto sa ilang mga magtutunghang nag-eskwela sa mga pribadong tunghaan nga wala na ma-accomodate sa mga public schools.
Kini ilabina nga parte gihapon sa basic education ang K-12 program ug dili sa CHED.
