BUTUAN CITY – Isip suporta sa swine industry sa Cabadbaran City, Agusan del Norte, gitunol sa Department of Agriculture-Caraga pinaagi sa ilang Livestock Program ang 10-milyunes pisos nga balor sa mga proyektong ilalom sa Integrated National Swine Production Initiatives for Recovery and Expansion kon INSPIRE program ngadto sa lokal nga kagamhanan sa maong dakbayan.
Sa eksklusibong pakighinabi sa Bombo Radyo Butuan, gibutyag ni Department of Agriculture-Caraga Regional Executive Director Engr. Ricardo Oñate, ang maong kantidad gamiton sa pag-construct og balor 6-milyunes pisos nga dakbalay ug pagpalit og balor sa 2.4-milyunes pisos nga 300 ka buok mga baktin ingon man balor sa 1.6-miyunes pisos nga feeds, mga tambal ug mga biologics.
Sigon sa opisyal, kabahin lang kini sa 20 ka mga tukurong dakbalay sa tibuok rehiyon kansa parte sa ilang interventions alang sa malahutayong tuburan sa de-kalidad nga mga baboy nga mahimong available ug accessible ngadto sa mga local farmers.
Nasayrang ang INSPIRE program kabahin sa rehabilitation efforts tungod sa epekto sa African Swine Fever pinaagi sa swine re-population ug pag-establisar sa mga swine farms ug mga facilities.
Kinahanglan matud pang magbinantayon ang tanan ilabina nga dili malikayang duna’y mga baboy nga gikan sa laing rehiyon ang manglusot usab dinhi sa Caraga Region nga gila-umang magpasamot sa problema sa ASF kung dili mabantayan.
