BUTUAN CITY – Ubay-ubay nga mga kada-ugan ang natala sa Agri-Boost project sa Butuan City government ning mi-aging tuig 2023.
Sa eksklusibong pakighinabi sa Bombo Radyo Butuan, gibutyag ni Butuan City Agriculturist Engr. Pierre Anthony Joven nga pinaka-unang natalang kada-ugan sa maong proyekto mao ang pag-deliver sa mga gulay nga tinanom sa mga vegetable farmers ning siyudad sugod niadtong Marso 17 kondiin mi-abot gilayon sa 1,000-kilos kada-semana.
KIni taliwa sa taas-taas nga uwan sa unang mga buwan ug sa kamatu-urang anaa pa lang sila sa pilot implementation sa nasangpit nga proyekto ilabina nga innovation project kini nga kinahangalng tun-an pa og maayo.
Dugang sa opisyal, sa pagtapos sa tuig 2023, mi-abot na sa 9-mil kilos sa nagkada-iyang gulay ang ilang na-deliver kada-semana.
Giklaro pa ni Engr. Joven nga ang tanang segmented traders ilang gihi-usa pinaagi sa usa ka mediator nga mao ang Agri-hub processing center kansa mao na ang gitahasan pagproseso, pagkontrola sa kalidad sa mga produkto ug maoy mupalit sa mga niini gikan sa mga vegetable farmers gamit ang nasabutan na daan nga presyo.
Ang nasangpit nga processing center usab ang naghatag og venue mga market vendors sa kuhaon nilang mga gulay gikan sa mga mag-uuma gamit ang usa ka mobile application.
