BUTUAN CITY – Hingpit nang gi-ablihan kaganinang buntag ang Business One Stop Shop kon BOSS ning dakbayan sa Butuan sa pagpanguna ni Butuan City Vice Mayor Lawrence Lemuel Fortun.
Sigon ni Vice Mayor Fortun, gipangkamotan sa lokal nga kagamhanan nga ma- integrate o kaha mahi-usa gyud ang proseso sa pagkuha ug pag-renew sa business permit ngadto sa usa lamang ka lugar sa ingon mahimong hapsay, dili hasol ingon man dili na magtabok-tabok pa pagproseso sa ilang mga papeles ang mga negosyante.
Mahikay na matod pa sulod sa 15 minutos ang mga papeles tungod kay anaa man lang sa usa ka venue sa Robinson’s Place ang nagkada-iyang ahensya sa gobyerno sama sa SSS, Philhealth ug Bureau of fire protection alang sa mga requirements.
Samtang gibutyag usab ni Association of Barangay Captains kon ABC Butuan City Federation President Gemma Tabada nga dakong pabor alang sa matag-barangay nga ma-secure ang pagpangolekta og buhis ingon man maserbisyohan sila ug husto sa pagkuha ug bussiness permits sa ilang barangay tungod kay aduna matod pa silay kasinatian nga dili gilayon sila makahatag gumikan kay wala silay official receipt kon OR nga available.
