BUTUAN CITY – Hugtanong gisupak sa Kilusang Magbubukid ng Pilipinas kon KMP apil na sa tanang industriya sa bugas ang kamanduan ni Agriculture Sec. Francisco Tiu-Laurel Jr. nga mag-import pa og bugas ang nasud.
Sa eksklusibong pakighinabi sa Bombo Radyo Butuan, gipadayag ni Kilusang Magbubukid ng Pilipinas kon KMP chairman Danilo Ramos nga dili makatarunganon ang maong kamanduan tungod kay dako ang mahatag nga negatibong epekto niini ngadto sa mga mag-uuma.
Sigon ni Ramos, bag-uhay lang gipadayag sa Department of Agriculture nga igo ang supply sa palay ug bugas base na sa ilang inventory kondiin puno-puno pa ang mga bodega tungod sa kadaghan sa na-ani atol sa peak harvest season niadtong Septembre ug Oktubre.
Pamatuod lamang matud pa nga wala’y kasing-kasing ang bag-ong kalihim sa departamento ngadto sa mga local farmers ug sa konsumidor tungod kay ang mas epektibo matud pang himuon, mao man ang pagpakusog sa lokal nga rice production.
Kini tungod na usab sa kamatu-uran nga sa pagsulod sa imported rice, dili mukunhod ang presyo sa bugas diha sa mga merkado.
Giklaro pa ni Ramos nga dili tinuod ang balaud sa supply and demand kondiin kung kusog ang demand, mubarato ng baligya tungod na usab sa nagtunhay nga mga cartels sa negosyo apil na niini ang bugas rason nga tungod sa mga cartels, gibarat nila ang palay sa mga mag-uuma panahon sa ting-ani taliwa nga base sa balaud, kontrolon unta matud pa kini sa National Food Authority apan sa tinud-anay nga nahitabo, wala’y gipamalit nga local rice ang ahensya.
