BUTUAN CITY – Gihaya na sa usa ka punerarya sa Prosperidad, Agusan del Sur ang usa ka pulis human kini namatay sa disgrasya atol sa endurance ride kagahapon sa alas-6:50 sa buntag didto sa Purok 2, Brgy. Magsaysay, lungsod sa Prosperidad, Agusan del Sur.
Naila ang biktimang si Kim Cachero Ladaga,46-anyos, residente sa Bacuag, Surigao del Norte.
Migawas sa inisyal nga imbestigasyon nga ang kolor itom nga Yamaha XMax nga gimanihuan sa pulis ug ang motorsiklong BMW nagdagan sa susamang direksyon gikan sa Lianga, Suirigao del Sur ug padulong unta dinhi sa dakbayan sa Butuan apan pag-abot sa dapit nga nahitabuan, na-igo sa XMax ang likod nga bahin sa BMW nga motorsiklo.
Tungod sa kakusog sa impact, mitabok kini sa pikas lane diin kasugat niini ang usa ka forward truck hinungdan nga patay on-the-spot ang maong pulis samtang wala ra ma-unsa ang driver sa BMW.
Gikostudiya na usab sa kapulisan ang driver sa trak nga si Renurd Guillate, 26-anyos, residente sa Purok 5, Brgy. Piglawigan, Esperanza, Agusandel Sur.
