BUTUAN CITY – Patay ang narekober sa sapa ang magtutudlong si Junard Caberte Saguidon sa Sitio Balobo, Purok 5, Brgy. Bunaguit, Esperanza, Agusan del Sur human nalumos dihang mitiklaob ang ilang gisakyang gakit tungod sa kalit nga pagbaha atol sa pagpa-uli na unta niini.
Sa eksklusibong interview sa Bombo Radyo, gipadayag ni PSgt Randy de Ocampo, officer-in-charge kon OIC-designate sa Esperanza, Agusan del Sur, nga sakay sa gakit niadtong Huwebes sa alas-singko sa hapon ang magtutudlo ka-uban ang laing upat ka magtutudlo ug usa ka bata uban sa gikarga nga motorsiklo dihang patabok na sa sapa sa Brgy. Salug sa susamang lungsod.
Kalit lang matud pang mitubo ang tubig nga mugna sa pagbaha sa bukid kondiin na-apsan sila rason sa pagtikla-ob sa gakit nga mi-anod sa biktima kinsa kagahapon pa sa buntag napalgan nga wala na’y kinabuhi.
Nasayrang gikan pa ang mga biktima sa Guibonon Elementary School ug pa-uli na unta dihang nahitabo ang insidente.
