BUTUAN CITY – Miabot sa kinatibuk-ang 16 ka mga pamilya ang apektado sa natigayong sunog kagahapon sa alas 2:15 sa hapon sa Purok-8, Barangay Ong Yiu ning siyudad sa Butuan human na-ugdaw ang 13 ka panimalay.
Sa pakighinabi sa Bombo Radyo Butuan, gibutyag ni Barangay Ong Yiu Kapitan Wilbert Ejos, nga ang hinaling gikan sa kusina sa pamilyang Blanco ang hinungdan sa pag-ulbo sa kalayo human nabiyaan matud pa sa 12-anyos nga bata.
Tungod kay sagad gama man sa light materials ang maong mga panimalay, paspas nga mikuyanap ang kalayo apan wala na makatabok pa sa pikas tampi tungod sa pagtinabangay sa mga bombero ug sa mga residente sa maong lugar.
Lakip sa gipasalamatan ni Kapitan Ejos ang pagtinabangay sa katawhan nga maoy miluwas sa duha ka senior citizens nga maglisud na og lakaw.
Sa karun, temporaryong misilong ang mga apektadong pamilya sa ilang mga silingan nga wala nadamay sa sunog.
Nakadawat na sila og tabang gikan sa City Social Welfare and Development Office kon CSWD ug mga pribadong grupo.
Nagpahimangno na lang ang kapitan ngadto sa mga ginikanan nga dili pasagdan ang mga bata nga maghaling.
