BUTUAN CITY – Mitala og daghang mga samaron lakip na niini ang mga miyembro sa Philippine National Police sa disgrasyang natigayon pasado alas 7:45 kagabii sa may Diversion Road, D.O. Plaza Avenue, Brgy. Baan Km3., Butuan City diin nalambigit ang patrol car sa pulis.
Sa nakuhang impormasyon, sakay sa Toyota Hilux Mobile Patrol Car 1877 sa Butuan City Police Station-4 sila PCpl Glenn Harris Villaro ang drayber; PMSg Jowil L Coquilla; PCpl Lygee T Plaza; PCpl Jayramel Pagaduan og usa ka Vincent Aropo Guzan, 19-anyos, olitawo nga residente sa Purok 13, San Juan, Brgy. Florida, Butuan City kansa suspek sa gitoohang Carnapping samtang ang laing sakyanan mao ang Blue Ford Everest nga dunay plaka numero YJA 121 nga gimanehuan ni Mirko Hamburg Franke, usa ka German National og sakay sila Rachel Marinag, 26-anyos, kapuyo sa drayber og ang anak nilang 4-anyos nga batang lalaki.
Nasayran nga samtang pa-amihanang direksiyon ang patrol car sa dihang kalit kining gisungag sa kasugat nga sakyanan.
Tungod niini, nakahiagum og dili tiaw nga mga samad ang mga sakay sa duha ka sakyanan.
Ang German National og ang kaubanan niini daling gidala sa Butuan City Medical Center diin ang maong german national, nabuak ang papangig og nagsuka-suka samtang stable na usab ang kahimtang sa mag-inahan.
Sa Doctors Hospital usab gidala ang mga pulis diin stable na sila PMSg Coquilla, PCpl Pagaduan, PCpl Villaro og ang suspek nga si Vincent apan si PCpl Plaza ang nabalian og gusok apan ang tanan gitambagang mag-admit sa ospital.
