BUTUAN CITY – Gikumpirma ni Police Master Sergeant Allan Callaw, imbestigador sa kapulisan sa Carmen, Agusan del Norte nga problema sa gugma ang hinungdan sa pagkutlo sa 18-anyos nga ulitawo sa iyang kinabuhi.
Sa eksklusibong pakighinabi sa Bombo Radyo Butuan, gipadayag sa opisyal nga pasado alas-6:30 kagahapon sa buntag dihang napalgan sa iyang mga kabanay ang biktimang si Ely Balisado Daa, ulitawo nga nagbitay na sa kusina sa ilang panimalay sa Purok 2, Sitio Bulihon, Brgy. Tagcatong, Carmen, Agusan del Norte kansa gidala pa kini sa Nasipit District Hospital apan gideklara nang dead-on-arrival.
Sigon sa opisyal, ning mi-aging buwan, misulay na kini pagpakamatay apan wala madayon human kini nasakpan ug daling naluwas. Posible matud pang wala pa ka-move on ang biktima sa pagpakigbuwag sa iyang uyab kaniya rason nga gidayunan na niya kini kagahapon sa kaadlawon.
Kumbinsido usab ang pamilya nga wala’y foul play sa maong hitabo base na usab sa suicidal notes nga gibilin niini alang sa iyang inahan ug iyang hinigugma.
