BUTUAN CITY – Gipasakaan na og kaso si Nelson Jamisola, 27-anyos, ang lalaki nga gitu-uhang lango sa ginadiling druga human brutal nga mipatay sa iyang live-in partner didto sa Bukidnon. Sa CCTV footage nga ningkuyanap na karon sa internet, kansa mao ang gigamit sa kapulisan aron makasuhan ang suspetsado, makita nga gimaayo pagkulata sa suspek ang iyang 22-anyos nga ka-ipon nga si Kimberly Achias nga iya pang gidunggab-dunggab.
Makita sa video ang lalaki nga mikuha sa 9 ka bulan pa lamang nila nga anak ug gi bundak sa sofa, diin nahagbong pa kini sa salog. Sigon ni PCapt. Angel Winston Alon Salvacion, ang Deputy Chief of Police sa Don Carlo Police Station, mi-abot sa 16 ka mga samad dinunggaban sa li-og ang na-angkon sa biktima gikan sa suspek nga misulay pa pag-ikyas, apan wala kini nakapalag dihang gidakop kini sa kapulisan.
Sumala sa kapulisan, anaa na sa luwas nga kahimtang ang anak sa biktima nga anaa na sa ginikanan sa babaye.
Dugang pa niini, dili pa nila ma-istorya og tarong ang suspek kinsa mi-angkon nga nakagamit og illegal nga druga atol sa panghitabo. Na-abtan pa sa kapulisan ang babaye na duna pa’y ginhawa apan namatay na kini dihang ilang nadala sa balay-tambalanan.
