BUTUAN CITY – Gi-andam na ang tukmang kaso nga ipasaka batuk sa gi-ilang Regional Priority Target sa Caraga Region ug sa iyang ka-uban nga gi-ilang bag-ong drug personality human ang malampusong anti-illegal drug buy bust operation pasado alas-7:55 kagabii sa usa ka beach resort sa Purok 1, Brgy. Masao ning syudad sa Butuan.
Naila ang suspek nga si Kenneth Jed Libor Bariquit, 34-anyos, minyo, wala’y trabaho ug residente sa Purok 3, Brgy. Ampayon, ning syudad sa Butuan samtang ang ka-uban niini, naila usab nga si Liezel Mayoga Talines, 19-anyos, dalaga, grade 12 student ug residente sa Purok 5, Brgy Alegria, San Francisco, Agusan del Sur.
Nakuha gikan kang Bariquit sulod sa lawak nga ilang gi-abangan ang usa ka dakong plastic sachet nga dunay sulod nga gitu-uhang shabu nga maoy buy bust item; laing tulo ka plastic sachets nga dunay sulod nga susamang epektos, laing usa ka plastic sachet nga dunay sulod sa gituohang shabu nga gibana-banang mitimbang og 130-gramos ug gibana-banang mubalor sa P884,000 pesos.
Lakip sa nakuha ang usa ka orihinal nga P1,000 peso bill ug 17 ka tag-usa ka libo ka pesos usab nga boodle money; usa ka cellphone ug pitaka.
Samtang nakuha usab gikan kang Talines ang usa plastic sachet nga dunay sulod sa gidudahang shabu ug cell phone.
Nasayran nga naaresto na niadtong Marso 2017 ang suspek kinsa gi-ilang Regional Priority Target Top 10 ning rehiyon.
