BUTUAN CITY – Gi-andam na ang mga dokumento ug mga ebidensya alang sa tukmang kaso nga ipasaka batuk sa usa ka high value individual human ang malampusong pagronda sa iyang pinuy-anan pasado alas-10:28 kagabii.
Bitbit ang search warrant, nakuha gikan sa posisyon ni Retchie Lopez Bantilan alyas Dodong, 26-anyos, ulitawo ug residente sa Purok 9, Bingkilan, Brgy. San Vicente ning siyudad sa Butuan ang gibana-banang 100-gramos sa suspected shabu nga nagkantidad og 680-mil pesos.
Ang maong gidaghanon sa ilegal nga drugas, gilangkuban sa 18 ka mga dagko ug 5 ka gagmay’ng sachets usab sa maong epektos.
Nakurat ang operating team sa bag-ong modus human nga gisulod sa suspek ang maong drugas sa putos sa mga junk food kansa ibilin lang sa masabutang lokasyon samtang ang bayad ipaagi lang sa GCash.
Gihimo ang anti-illegal drug operations sa mga sakop sa City Intelligence Unit sa Butuan City Drug Enforcement Unit pagpanguna ni PMajor Randy Azote human ang pila ka adlaw nga surveillance.
