BUTUAN CITY – Duha ang patay samtang ubay-ubay ang angol sa panagbangga sa kolor puti nga Isuzu elf truck ug kolor puti usab nga Toyota Hi-Ace van kagahapon sa alas-5:26 sa sayong gabii sa may Diversion Road sa Brgy. La Paz-Tago, lungsod sa Bayabas, Surigao del Sur.
Naila ang mga nakabsan sa kinabuhi nga sila Quinmar Daguinot Sanchez, 52-anyos, minyo, driver sa elf truck, residente sa Brgy. Purisima, Tago, Surigao del Sur ug ang usa sa mga pasahero sa van nga si Devenelh Sanchez Fabre, 48-anyos, minyo, empleyado sa Land Transportation Office kon LTO ug residente sa Brgy. Buhagin, Davao City.
Migawas sa inisyal nga imbestigasyon nga sakay sa van nga gimanehuan ni Allen Gio Amante Alagar, 21-anyos, residente sa Victors Communal, Brgy. Buhangin, Davao City ang 14 ka mga pasahero.
Migawas sa inisyal nga imbestigasyon nga ang van nga gikan sa Tandag City, padulong unta sa Davao City, dihang nakasugat niini ang elf truck kansa kalit lang misulod sa dapit nga nahitabuan, resulta sa maong insidente.
Gidala gilayon ang mga angol sa Adela Serra Ty Memorial Medical Center aron matambalan apan gideklara nang patay ang duha.
