BUTUAN CITY – Pabilin karung mipasilong sa evacuation center sa may Barangay Culit, Nasipit, Agusan Del Norte human na-apektuhan sa dakong pagbaha nga misugat sa pagsaulog sa pasko kagahapong adlawa hatud sa daot nga panahon.
Sigon ni Kapitan Ruel Pepito nga muabot sa 66 ka pamilya o 366 ka indibidwal lakip na niini ang 30 ka senior citizen ang mibakwit gikan sa tulo ka mga Purok, ang Sitio Sumagayad, Purok-2 og Purok-4. Natunulan ang mga apektadong indibdiwal sa ilang hinanaling panginahanglanon samtang mihatag usab og tabang ang mga Sanguniang Bayan Members.
Saysay pa ni Kapitan Pepito nga sa dihang nadawat niini ang mensahe gikan ni Kapitan Ireneo Lauro sa Barangay Jaguimitan sa kagabhion niadtong Disyembre 24, gelayon niyang gisusi ang mga flood prone areas og didto misugat ang grabe kadako sa tubig nga unang higayon niyang nakita sukad-sukad.
Dunay mga pag-rescue nga ilang gihimo diin sa Sitio Sumagayad katabang nila ang Bureau of Fire Protection kon BFP-Nasipit samtang sa Purok-2 usab mihimo sa pagrescue ang mga personahe sa 23rd Infantry Batallion, Philippine Army. Sa Purok-4, dunay mga residente usab nga mitongtong sa atop aron didto magsumikad sa ilang pagtabok sa tubig human nasudlan na og baha ang ilang panimalay.
Hinoon gipasalamat ni Kapitan Pepito nga walay mga indibidwal nga na-angin sa maong pagbaha samtang dunay mga hayop hinoon ang nakalas sama sa 4 ka mga kabaw og 3 ka baka walay labot pa niini ang mga baboy, kanding og mga manok.
Nasayrang sa ibabaw niini nga barangay o ang barangay Jaguimitan, dakong damyos usab ang gibilin sa maong baha, diin gawas sa mga panimalay dunay mga hayop usab nga napatay sama sa duha ka kabayo, 2 ka baka og mga manok.
Base sa mga estorya sa katigulangan, ang maong tubig-baha mas dako pa kumpara sa nasinatiang dakong pagbaha niadtong 1989.
